Istouère
Ao 9 de Delaire 1934, Eugène Cairou fit adopter l-s estatuts du Cercl par la Grand-Assembllée constitu bâtissouére.
Sujit : “Eune souéte dite KELC’H KELTIEK ROAZHON – CERCLE CELTIQUE DE RENNES, q’a en devize “Me a zalc’ho” (je tiendrons bon), ét bâttie su Rene assourfin d’ergrouper lés Bertons qi vouraent prendr part a l’erchomance moral e savant de lou payiz, a l’erqenéssanc. Eugène CAIROU ét eluzë perzident. La decllerézon ét féte a la Prefeterie d’Ile-e-Vilaine, ao 23 de Jenvier 1935.
Parai côme berchôze de souétes q’enrayaent den le temp-la, le Cercl se boutiqe a l’ôtë a M. Régnier. En 1934, i s’etablli és Salons d’Orsay, 1, rue Thiers. Touéz ans aprés, i ressieut den sés fezeries den la piece ao 25, rue de la Prée-Perchée, i n-en devienra métr en 1959. A sieudr le reneuvrissement du qartier, la S.E.M.A.E.B. rajète l’endret ao 2 de Juillète 1974, pour eune sôme qi ne dône point mouayen d’ajeter eune grandour eqhipolente. L’assiâ de la souéte ét enveyë a l’ôtë a Jean-Pierre Vincent, 28, rue dés Gantelles. A esperer qe le Cercl seje relojë, il emplaye maintyeuns endrets, la piece pretée par l’O.S.C.R a Vilejan terjous. Ao 1er d’Otobr 1977, la Vile mét d’amain eune bâtisse reneuvrie de la Metive de la Herpe.
A ressieudr den sés fezeries durant la gherre, le Cercl s’ebluce core e fét nétr maintieunes crayezons. Ét en 1954, qu’ont të concrayës lés permiers Balets bertons, d-s assais d’atrément dés danses bertonnes en guerouédanserie, ça q’a durë qheuqes anées e q’ara të imitë qheuqes fais. N-i a-z û l’ourée Yaouankiz Breizh de concrayée, ça q’ara aguerouë durant diz anées de temp censement 150 jieunes sonous (Bagad Yaouankiz e Bagad Kadoudal) e dansous. Pus fré, en 1985, n-i a-z û l’Ensembl de Guerouédanserie de concrayë, qi ressieud, core anët a montrer le Cercl a la Bertègn e âillou, den le monde partout.
La rayée-la du Cercl devers le dehô a terjous të de méme. Den l-s anées 1950, nen menit maintieuns veyaijes den lés payiz Celtiqes. Durant diz anées de temp, de 1952 a 1961, lés souétous du Cercl ont prinz part és tournées de recllâme touristiqe menées par le Comitë Rejiona de tourism de Bertègn den lés payiz vaizins : Alemègn, Beljiqe, Olande, Luqsembour, Aotriche, Suisse. Dedpès 1989, n-i a-z û maintieuns echanjes qhulturaos o d-s Ensembls d’arts e tradicions du peupl du monde a yètr bâtis. Lés maintieunes fais qe le nen a prinz part és pus grandes féteries tradicionales bertonnes e uropiënes eyou qe nen fut prizës ont minz le Cercl Celtiqe a deveni Baçadou de la Qhulture Bertonne.
